VoyNavo.Uz O'zbekona sevimli portal

Armiyaga bormaganlarga harbiy guvohnoma beriladimi?

vodiysoz — Wed, 10 May 2017 15:42:13 GMT

O`g`lim 36 yoshda, harbiy xizmatga bormagan. Endi harbiy guvohnoma olishi mumkinmi? Qaerga murojaat qilish kerak va jarima to`lanadimi?

Zumrad Azimova, Toshkent shahri

M.ABILOV, Mudofaa vazirligi bo`lim boshlig`i:

— O`zbekiston Respublikasi fuqarolari harbiy guvohnoma olish uchun doimiy yashash joyida (vaqtincha yashash joyi) harbiy hisobda turgan Mudofaa ishlari bo`limiga ariza bilan murojaat etishlari lozim, o`z o`rnida Mudofaa ishlari bo`limlari tomonidan harbiy guvohnoma olish uchun zarur bo`lgan hujjatlar ro`yxati taqdim etiladi.

Chaqiriluvchilar va harbiyga majburlarning harbiy ro`yxatdan o`tish qoidalarini buzishi, shuningdek, chaqiruv bo`yicha Mudofaa ishlari organlariga uzrsiz sabablarga ko`ra kelmasligi yoki turar joyi, o`qish joyi, ish joyi va lavozimidagi o`zgarishlar to`g`risida ma`lumotlarni qaerda harbiy hisobda turgan bo`lsa, shu organga o`z vaqtida ma`lum qilmasligi Ma`muriy javobgarlik to`g`risidagi Kodeksga asosan jarima undirilishiga sabab bo`ladi.

Kollejda kontrakt asosida o`qisa bo`ladimi?

vodiysoz — Wed, 10 May 2017 15:36:21 GMT

Kasb-hunar kollejlarida to`lov-kontrakt asosida o`quv kurslari ochilibdi, deb eshitdim. Agar ochilgan bo`lsa, to`lovi qancha?

Dilniyoz, Toshkent shahri

X.ZIKRILLAEV, O`rta maxsus, kasb-hunar ta`limi markazi direktorining birinchi o`rinbosari:

— Vazirlar Mahkamasi Ta`lim va ilm-fan masalalari kompleksining 2016 yil 28 dekabrdagi 1-sonli yig`ilishi qarori bilan va Adliya vazirligi tomonidan 2008 yil 21 avgustda 1844-son bilan davlat ro`yxatidan o`tkazilgan “O`zbekiston Respublikasi ta`lim muassasalarida ikkinchi va undan keyingi ta`limni olish tartibi to`g`risida”gi Nizom asosida Respublika kasb-hunar kollejlariga umumiy o`rta ma`lumot va o`rta maxsus, kasb-hunar ma`lumotiga ega shaxslarni to`lov-shartnoma asosida qabul qilish rejasi tasdiqlandi.

Shunga ko`ra, O`rta maxsus, kasb-hunar ta`limi markazining 2016 yil 31 dekabrdagi 366-sonli buyrug`i chiqarilib to`lov-shartnoma asosida o`qishni xohlovchilarni qabul qilishga ruxsat berildi.

To`lov shartnoma summasi kasblar turiga qarab bir yilu olti oyga 2 mln. 100 ming so`mdan boshlab, 2 mln.284 ming so`mgacha belgilangan.

APL. “Arsenal” ishonchli tarzda “MYu”ni mag`lubiyatga uchratdi

vodiysoz — Sun, 07 May 2017 18:15:06 GMT

Angliya chempionati 36-tur markaziy o`yinida “Arsenal” jamoasi o`z maydonida “Manchester Yunayted” futbolchilarini qabul qildi.

Anchagina qiziqarli kechgan o`yinda “to`pchilar” 2:0 hisobida g`alaba qozondi. Uchrashuvning 54-daqiqasida Granit Jaka hisobni ochgan bo`lsa, 3 daqiqadan keyin Danni Uelbek hisobni oshirdi.

Shu tariqa, Arsen Venger murabbiylik faoliyatida birinchi marta APL doirasida Joze Mourino jamoasini taslim qildi.

Arsenal – Manchester Yunayted 2:0 (0:0, 2:0)

Gollar: 1:0 – 54 Jaka, 2:0 – 57 Uelbek.

Arsenal – Chex, Koselni, Monreal, Gibbs, Xolding, Remzi, Oksleyd-Chemberlen (Belerin, 84), O`zil, Jaka (Koklen, 76), Sanches, Uelbek (Jiru, 84).

Manchester Yunayted – De Xea, Jons, Darmian, Tuanzebe, Smolling, Mxitaryan (Lingard, 61), Kerrik, Errera (Reshford, 63), Mata (Maktomini, 84), Marsyal, Runi.

Ogohlantirish: Koselni (67).

Hindistonda 200 nafar o`quvchi qiz gazdan zaharlandi

vodiysoz — Sun, 07 May 2017 18:05:24 GMT

Hindistonning Dehli shahrida gazdan zaharlanish oqibatida 200 nafar o`quvchi qiz jabrlandi, deb xabar berdi Lenta.ru .

Mahalliy vaqt bilan soat 07:30 da Rani Jxansi (Rani Jhansi) nomli qizlar maktabi yonida joylashgan konteyner omborxonasida gaz sirqib chiqqan. Zaharlangan o`quvchilarda ko`ngil aynish, ko`z qichishish alomatlari namoyon bo`lib, ba`zilari hushdan ham ketgan. Gaz chiqqan vaqtda o`quvchi qizlar sinfda, darsda bo`lgan.

Dehli o`t o`chirish xizmati (DFS) zobiti Atul Garg (Atul Garg) voqea joyida ish olib borilayotgani haqida ma`lumot berdi: “Rani Jxansi maktabi o`quvchilari va o`qituvchilari evakuasiya qilinib, maktab hududi qurshab olindi”, dedi u.

Bosh vazir o`rinbosari Manish Sisodiya bolalarning hayoti xavf ostida emasligini ma`lum qildi. “Qizlar va shifokorlar bilan gaplashdim, ularning ahvoli yaxshi”, deb yozdi u o`zining Twitter akkauntida. NDTV hind telekanali bergan xabarga ko`ra, o`quvchi qizlar pestisid ishlab chiqarishda qo`llanadigan zaharli modda — xlormetil piridindan zaharlangan.

Isroilda nikohni bekor qilish uchun o`n yildan ortiq vaqt ketadi

vodiysoz — Sun, 07 May 2017 17:36:12 GMT

Isroilda turmush qurayotgan aksariyat yoshlar nikohni rasman qayd etishni xohlamaydi, deb xabar berdi “1tv.ru” nashri.

Isroilda bir tomonning xohishi bilan ajrashib bo`lmaydi. Ba`zi bir erkaklar nikohni bekor qilish uchun rafiqasidan 150 ming evro pul to`lashni talab qilishdan ham qaytmayapti. Muhabbat va nafratning orasi bir qadam ekanligiga Ilanit o`z hayotiy tajribasi orqali amin bo`ldi. U turmush qurgandan keyin bir yil o`tar-o`tmas, oilasida turli nizolar chiqa boshladi. Janjallardan charchagan ayol ajrashishga qaror qildi, ammo oradan besh yil o`tib ketganiga, turmush o`rtog`i bilan yashamasligiga qaramay, Ilanit hamon nikohni rasman bekor qilolmadi. “Erimning qaerdaligini bilmayman. Yoshim 37 ga to`ldi, to nikohni bekor qilmas ekanman, qayta turmush qura olmayman, farzand ko`ra olmayman. Boshqa erkak bilan rasman nikohi qayd etilgan ayol boshqa erkakdan farzand ko`rsa, mamlakatimizda bunday ayolning haq-huquqlari chegaralanadi”, deydi Ilanit Appelshteyn.

“Isroilda erkak rafiqasidan ajrashgandan keyin katta miqdorda tovon puli to`lashi lozimligi tufayli bunga rozilik bermaydi. Ammo tomonlardan birining noroziligi tufayli sud nikohni bekor qila olmaydi. Ayollar nikohni rasman bekor qilish uchun 10-15 yillab kutishga majbur bo`lmoqda. Hattoki bir mijozimning eri ajrashish uchun rafiqasidan 150 ming evro talab qildi. Agar shu mablag`ni bersa, nikohni rasman bekor qilishga rozi bo`lishini ma`lum qildi”, deydi huquq himoyachisi Bati Kaana Dror.

Shuning uchun ham isroillik yoshlar Evropa mamlakatlarida nikohdan o`tishga harakat qilishmoqda, chunki chet elda ajrashish hech qanday muammo tug`dirmaydi.

Uy tozalashda asqotadigan tavsiyalar

vodiysoz — Thu, 20 Apr 2017 15:18:00 GMT

Ko‘pchiligimiz uy tozalashni zerikarli va ko‘p vaqt oladigan mashg‘ulot deb hisoblaymiz. Biroq ba’zi usullar borki, ular ushbu jarayonni ancha yengillashtiradi. Uy tozalashda asqotadigan bunday usullarning bir nechtasini quyida o‘qishingiz mumkin.

Blenderni tozalash uchun…

Blenderga iliq suv solib, bir necha tomchi suyuq sovun tomizing. So‘ng blenderni bir necha daqiqaga yoqib qo‘ying. Uni o‘chirgach, taom yuqini osongina ketkazish mumkin bo‘ladi.

Gilamdagi kir dog‘ini ketkazish uchun…

Osh sodasini biroz suv bilan aralashtirib, pasta hosil qiling va uni gilamning kirlangan joyiga suring. Kechasi bilan shu holda qoldirib, ertasi kuni changyutgich bilan tozalab olishingiz mumkin.

Yana bir usul gilamdagi dog‘ga suv (2/3) va sirka (1/3) aralashmasini surishdan iborat. So‘ng o‘sha joyni ho‘l latta bilan yopib, ustidan dazmol yugurtiring.

Charmdan qilingan jihoz eskirib qolgan bo‘lsa…

Uni poyabzal uchun mo‘ljallangan oddiy krem yordamida ishqalab artib chiqing. Shilinish va tirnalishdan hosil bo‘lgan izlar shu zahotiyoq yo‘qoladi.

Ko‘rpa-to‘shaklarni tozalash uchun…

Purkagichi bor idishga biroz aroq soling va uni to‘shakning butun yuzasiga sepib chiqing. To‘shakni ochiq havoda quriting. Aroq yoqimsiz hid taratadigan barcha bakteriyalarni o‘ldiradi.

Idish-tovoq yuvuvchi gubkani tozalash uchun…

Gubkani mikroto‘lqinli pechga bir necha daqiqaga qo‘yib oling. Bu zararli bakteriyalarning taxminan 99 foizini qirishga yordam beradi.

Yog‘li dog‘ni ketkazish uchun…

Kiyimingizga yog‘ tomsa, o‘sha joyga oddiy oq bo‘rdan suring. Bo‘r izini nam latta bilan artib tashlang.

Yumshoq mebelni tozalash uchun…

Divan yuzasiga spirtli aralashmani seping va muloyim gubka bilan artib chiqing. Shundan so‘ng qolgan kirni ketkazish uchun qattiq cho‘tkadan foydalaning.

Duxovka ifloslanib qolsa…

Yoyiqroq idishga yarim stakan ammiak solib, sovuq duxovkada bir kechaga qoldiring. Ertasi kuni duxovkani osongina tozalab olishingiz mumkin.

O‘zimiz bo‘yoqchilik qilamiz

vodiysoz — Thu, 20 Apr 2017 15:04:03 GMT

Yigit kishiga qirq emas, yetmish hunar ham oz aslida. Ayniqsa, dunyodagi kasb-hunarlar soni 30 mingdan oshgan bugungi kunda yetmish xil yumushni bajara olish dengizdan tomchidek bir gap. Keling, bu gal ana shunday kasblardan biri bo‘lmish bo‘yoqchilik sir-asrorlaridan bir shingilini o‘rgansak. Zero, ushbu yumushni o‘zingiz mustaqil ravishda bajarsangiz, usta-yu mardikorlarga sarflaydigan xarajatni qisqartirish, qolaversa, uyingizni didingizga mos ravishda ta’mirlashga erishgan bo‘lasiz. Bilsangiz, qo‘lidan ko‘p ish kelishiga ishongan erkaklar hayotdan ko‘proq zavq oladi, ularning o‘ziga bo‘lgan ishonchi baland bo‘ladi, shu bilan birga, bunday turmush o‘rtog‘i bo‘lishi istagan ayollar ham ko‘pchilikni tashkil etadi, nima dedingiz?

Eshiklarni bo‘yash

Xonalar o‘rtasidagi eshiklarni bo‘yashda avvalo ularning qanday xom ashyodan tayyorlanganiga e’tibor qaratiladi. Temir, laminat, MDF va boshqa materiallar turlicha bo‘yashni taqozo etadi.

Yog‘och eshiklarni bo‘yashda ikki xil bo‘yoqdan foydalanish mumkin: shaffof va shaffof bo‘lmagan. Shaffof bo‘yoqlar yog‘ochning tabiiy ko‘rinishini saqlab qolishga yordam beradi. Bu borada ko‘pchilik moy va alkidli bo‘yoqlarni ma’qul ko‘rishadi. Ulardagi maxsus pigmentlar yog‘ochni asl holatda ko‘rsatish bilan birga, uni tashqi ta’sirlardan sifatli himoyalay oladi ham.

Dastlab eshikni bo‘yashga tayyorlash talab etiladi. Buning uchun shpaklevka (o‘ydim-chuqur joylarni tekislash) va gruntovka (xomaki bo‘yash) ishlari olib boriladi. Shundan so‘ng asosiy ishlar boshlanadi. Avvalo vertikal turgan eshiklar olinib, gorizontal yotqizilishi lozim. Shunda bo‘yoq pastga oqib ketmaydi.

Yog‘och eshiklarni bo‘yashning bir qancha usullari mavjud. Birinchi usulga ko‘ra, tabiiy moy asosida tayyorlangan bo‘yoq olinib, eshik bo‘yaladi, shundan so‘ng rezina shpatel yordamida uning sirti bo‘ylab 10-12 marta yurgiziladi. Rezina shpatel o‘rniga gubkadan foydalanish ham mumkin. Bunda gubka bo‘yoqqa botirilib, yog‘ochning tolalari yo‘nalishi bo‘ylab 2-3 daqiqa davomida surtib chiqiladi.

Eshiklarni cho‘tka yoki valik (maxsus g‘ildirakcha) yordamida bo‘yash mumkin. Valik keng sirtlarni, cho‘tka esa turli burchaklarni bo‘yashda qo‘l keladi. Bo‘yashdan avval sirtda hech qanday nuqson yoki asoratlar yo‘qligiga e’tibor qaratish lozim. Agarda eski bo‘yoq izlari qolgan bo‘lsa, uni tozalab tashlash kerak. Shundan so‘ng notekis sirtlarni tekislash uchun shpaklevka qilish talab etiladi. Shpaklevkadan so‘ng esa qumqog‘oz bilan yaxshilab tozalanadi. Hosil bo‘lgan sirtni chang va mayda qoldiqlar nam latta bilan artib tashlanadi. [via]

Yog‘och polni tayyorlash va bo‘yash

Xonadonini ta’mirlashga kirishgan oila boshliqlari polning sifatli bo‘yalishi oila a’zolarining ruhiyatiga doimo ijobiy ta’sir ko‘rsatishini unutmasliklari lozim. Buning uchun ham huddi yog‘och eshikda bo‘lgani kabi polni bo‘yashga tayyorlashga alohida e’tibor qaratiladi. Dastlab pol sirtida chang, yog‘ qoldiqlari va boshqa mayda zarralar bo‘lmasligi uchun uni sovunli suvda yaxshilab artish lozim.

Agarda eski polni bo‘yash kerak bo‘lsa, ko‘chgan eski bo‘yoq qatlamlarini oddiy temir shpatel yordamida qirib tashlash, chiqib qolgan mixni esa bolg‘a bilan taxtaga 4 millimetrgacha urib kiritish kerak. Shundan so‘ng, imkon qadar butun pol randalab chiqiladi. Taxtalar orasi ham tozalanib, pol olif moyi bilan xomaki (gruntovka) bo‘yab chiqiladi. Agarda poldagi yog‘ochlar orasi katta bo‘lsa, 5ga 5 nisbatdagi oddiy qipiq va sementni suvga aralashtirib, oraliq bo‘shliqlarni to‘ldirib chiqish mumkin. Yoriqlar oralig‘i 6 millimetrdan oshgan taqdirda esa, yog‘ochlarni qaytadan joylashtirib chiqish talab etiladi.

Notekis sirtlarni shpaklevka yordamida yo‘qotishda xonaning namligini hisobga olish muhim. Agar xona quruq bo‘lsa yelimli, nam bo‘lsa yarimmoyli shpaklevkalardan foydalanish tavsiya etiladi. Yarim moyli shpaklevkani mustaqil tayyorlash uchun 5 litr suv, 0,5-0,7 kg duradgorlik yelimi va 1-1,5 kg oksol yoki olif moyi zarur (ish hajmiga qarab ular miqdorini shu nisbatda o‘zingiz belgilaysiz). Shpaklevka quyuq chiqishi uchun unga bo‘r (mel) aralashtirish mumkin. Hosil bo‘lgan aralashma polga yog‘ochlarga perpendikulyar tarzda 30-40 santimetrli temir yoki 15-20 santimetrli yog‘och shpatel yordamida surtib chiqiladi. Ushbu qatlam qurigandan so‘ng qumqog‘oz bilan silliqlanadi. Bunda qumqog‘ozni yog‘och bo‘lagiga o‘rab olish ishni osonlashtiradi. Navbatda quruq cho‘tka yordamida pol chang va zarralardan tozalanadi. Demak, pol bo‘yashga tayyor bo‘ldi.

Polni bo‘yashda moyli bo‘yoq (1-raqam), alkidli emal va alkidli bo‘yoqdan foydalanish mumkin. Odatda 1 m2 sahnni ikki marta bo‘yash uchun 200-250 gram bo‘yoq kerak bo‘ladi.

Bo‘yoqchilik ishlari plintuslarni bo‘yash bilan boshlanadi. Bunda bo‘yoq devorga tegib ketmasligi uchun kichikroq cho‘tkadan foydalanish lozim. Shundan so‘ng valik va cho‘tka yordamida ishga kirishiladi. Valik ishning tez va sifatli bitishiga yordam bersa, cho‘tka burchaklarni bo‘yashda asqotadi. Ish jarayonida bo‘yoqni tez-tez aralashtirib turish lozim. Aks holda pol rang bir-biridan farq qilib qolishi mumkin. Bo‘yalayotgan sirtda ko‘pik va burishgan joylar qolmasligi uchun bo‘yoq qotmasidan avval uning ustidan yana bir marta yupqa qilib bo‘yash kerak bo‘ladi. [via]

Metallarni bo‘yash

Temir eshik, darvoza, panjara, isitish batareyalarini bo‘yash ham alohida bilim va tajribani talab etadi. Bu ularning chiroyini ochish bilan birga, korroziyaga uchrashidan himoyalaydi ham. Temir sirtlar uchun moy bo‘yoq eng maqbul sanaladi. Ular ham nisbatan arzon bo‘lib, turli ob-havo injiqliklariga ham chidamli. Shuningdek, emal ham undan sira qolishmaydi. Bugun bozorlarda alkid va epoksidli tarkibga ega maxsus zanglashga qarshi bo‘yoqlarni ham uchratish mumkin. Biroq ularning narxi birmuncha qimmat.

Ruxlangan temir uchun moy bo‘yoq ma’qul topilmaydi. Buning uchun epoksidli bo‘yoq tavsiya etiladi. Rangli metallarni esa bo‘yash shart emas. Unga yanada jilo berish uchun lak bilan bo‘yab chiqish mumkin xolos. Agarda ular rangini o‘zgartirgingiz kelsa, suv-emulsion bo‘yoqdan foydalaning. Ochiq osmon ostida bo‘lsa, ularni alkidli emal bilan bo‘yaganingiz ma’qul.

Aksariyat temir eshik va darvozalar oddiy qora temirdan tayyorlanadi. Bunday temir korroziyaga chidamsiz bo‘lib, ayniqsa undan tayyorlangan konstruksiyalar ochiq osmon ostida joylashgan bo‘lsa, tezda yaroqsiz holga kelishi mumkin. Ayrim kishilar tashqaridagi temir buyumlarni emal bilan bo‘yashadi. Ammo bu unchalik maqbul yo‘l emas. Emal bilan ichkaridagi temir jihozlarni bo‘yagan ma’qul. Tashqarida esa…

Metalni bo‘yashga tayyorlash

Agarda metal avval ham bo‘yalgan bo‘lsa, uni tozalab chiqqan ma’qul. Buning uchun metal uchun mo‘ljallangan cho‘tka, qumqog‘oz yoki gorelkadan foydalanish mumkin. Shundan so‘ng sirt chang va zarrachalardan tozalab tashlanadi. So‘ngra temir sirti gruntlanadi. Grunt temirni korroziyadan qo‘shimcha ravishda saqlaydi. Shuningdek, kamroq bo‘yoq ketishiga xizmat qiladi. Rangli metallarni gruntlashda adgeziya, qora metal uchun esa maxsus antikorroziya vositalarini qo‘shish maqsadga muvofiq. Grunt ishlari tugagach, metalni bo‘yashga kirishaverasiz.

Tekis va keng sirtlar valik, burchaklar esa kichik cho‘tka bilan bo‘yaladi. Har bir bo‘yoq qatlamining qurishi kutiladi. Bunda bo‘yoqni maxsus vosita rastvoritel yordamida suyultirish ham yoddan chiqmasligi kerak. [via]

Oshxonada asqotadigan tavsiyalar

vodiysoz — Thu, 20 Apr 2017 14:58:38 GMT

Oshxonada albatta, onalarimizga teng keladigani yo‘q. Mazasi bir umrga tatiydigan taomlar tayyorlash va oshxonani saranjom-sarishta saqlashni ularga chiqarishgan. Biroq onalarimiz ham bilmasligi mumkin bo‘lgan oshxona bilan bog‘liq ba’zi sirlar borki, ulardan sizlarni quyida voqif etamiz.

Tuxum uzoq saqlanishi uchun sovitgichga solishdan oldin unga o‘simlik yog‘i suring.

Kesilgan tort qotib qolmasligi uchun uning kesilgan qismiga non bo‘laklarini gugurt cho‘pi yoki tish tozalagich yordamida mahkamlab qo‘ying.

Bir necha tomchi limon suvi zarur bo‘lib qolsa, bus-butun limonni kesishga shoshilmang. Uni tish tozalagich bilan teshib, sal siqsangiz, shu zahotiyoq limon sharbati tomchilay boshlaydi. So‘ng teshikchani skotch bilan yopib, limonni sovitgichga qaytarib qo‘ysangiz bo‘ladi.

Piyoz va sarimsoq piyozni saqlash uchun eng yaxshi joy — teshik-teshikli qog‘oz xalta. Bunday idishda ular ikki oygacha yaxshi saqlanadi.

Kartoshka nish otib ketmasin, desangiz uni olma bilan saqlang. Olmadagi etilen nishlar paydo bo‘lishiga qarshilik ko‘rsatadi.

Mango, kivi va avokadoni stakan yordamida tozalash qulay bo‘ladi.

Banan shodasining birlashgan qismini skotch bilan o‘rab qo‘ysangiz, u uzoq vaqt buzilmay saqlanadi.

Sarg‘ayib qolgan ko‘katlarni tashlab yuborishga shoshilmang. Ularni to‘g‘rab, sovitgichning muz idishiga solib chiqing, ustidan olivka yog‘idan quying. Uni muzxonada saqlab, zarur vaqtda salat, sous va sho‘rvalar uchun ishlatishingiz mumkin.

Sotib olgan bananingiz hali xomroq bo‘lsa, uni duxovkada “pishirishingiz” mumkin. Buning uchun ularni listga qo‘yib, qizdirilgan duxovkada 1—2 daqiqa ushlang.

Kanselyariya mixchasi qaynatilgan tuxumni archishni ancha osonlashtirishi mumkin. Buning uchun tuxumni qaynatishdan oldin, po‘stlog‘ini mixcha bilan kichik qilib teshib qo‘ying.

Erkaklar uchun zarur tibbiy tekshiruvlar

vodiysoz — Thu, 20 Apr 2017 11:35:32 GMT

Ko‘pchilik erkaklar salomatligi bilan bog‘liq muammolar mavjud bo‘lsa ham shifokor ko‘rigidan o‘tishni o‘ziga odat qilmagan. Biroq hech qanday shikoyat bo‘lmasa ham shifokor ko‘rigidan o‘tish lozim. Zero kasallikni davolagandan ko‘ra uning oldini olish ham oson, ham ancha arzon. Shuning uchun ham quyida erkaklar uchun eng zarur bo‘lgan yetti turdagi tibbiy ko‘rik haqida qisqacha ma’lumot berishni joiz deb topdik. Demak ular:

Diabet

Agarda siz sog‘lom turmush tarzi qoidalariga qat’iy rioya etsangiz, tana vazni va kasalliklarning rivojlanishiga qulay muhit yaratuvchi boshqa omillar (masalan, xolesterin miqdorining me’yoridan baland bo‘lishi yoki qon bosimining baland bo‘lishi) mavjud bo‘lmasa, diabet bo‘yicha chuqur tekshiruvlardan o‘tishga mutlaqo hojat qolmaydi. Ammo 45 yoshdan oshgan aksariyat erkaklar bunday deya olmaydi. Shu davrdan qondagi glyukoza va A1C miqdorini o‘lchatib borish tavsiya etiladi. A1C-test uchun qorin to‘q bo‘lishi talab etilsa, glyukoza meyorini aniqlashdan avval suvdan boshqa hech narsa iste’mol chilmaslik so‘raladi.

Jinsiy a’zolar infeksiyalari

Uzoq muddat davomida bir sherik bilan jinsiy aloqa qilgan taqdiringizda ham, mazkur ko‘rikdan o‘tish foydadan holi bo‘lmaydi. Chunki ayrim infeksiyalar yillar o‘tib ham yuzaga chiqishi mumkin.

Tana vazni indeksi

Mazkur ko‘rsatkichni aniqlash uchun shifokor huzuriga borish shart emas. Organizmdagi yog‘lar miqdorini aniqlash uchun bo‘yingiz va vazningiz o‘rtasidagi farqni ajrata olsangiz bas. 18.5dan 24.9 intervalgacha bo‘lgan ko‘rsatkich normal holat hisoblanadi.

Xolesterin

Amerika kardiologlar assosiatsiyasi erkaklarga 20 yoshdan keyin har 4-6 yilda qon tarkibidagi xolesterin miqdorini o‘lchab borishni tavsiya qiladi. Shaxsiy shifokor sizda diabet, chekish yoki yuqori arterial bosim mavjud bo‘lgan holda yanada qisqaroq muddatdan ushbu tekshiruvdan o‘tishni tavsiya qilishi mumkin.

Xolesterin miqdori qon tahlili asosida aniqlanib, tekshiruvdan avval 9-12 soat hech narsa yemaslik talab etilishi mumkin.

Arterial qon bosimi

Xolesterinda bo‘lgani kabi arterial qon bosimi ham hech qanday alomatlarsiz kechishi mumkin. Biroq bugun uni aniqlash oson, og‘riqsiz va juda arzon kechadi.

Prostata tahlili

Avvallari prostata bezi bilan bog‘liq muammolar 50 yoshdan keyin sekin-asta chiqib kelaverardi. Bugun esa bunday muammolar yosh tanlagani yo‘q. Atrof-muhitning ifloslanishi, zararli odatlar, turmush tarzining keskin o‘zgarib ketgani, avtomobil, kompyuter kabi zamonaviy omillar prostata bezi saratonining “yoshi”ni ancha kichraytirib yubordi. Shu bois ham o‘z vaqtida urolog ko‘rigidan o‘tib, prostata bezi holatini tekshirib turish lozim.

Ertalabki foydali odatlar

vodiysoz — Thu, 20 Apr 2017 11:27:33 GMT

Ertalabki odatlaringiz butun kun bo‘yi kayfiyatingiz qanday bo‘lishini belgilaydi. Shuningdek, ular ko‘rinishingiz va salomatligingiz yaxshi bo‘lishiga ham yordam beradi.

Bir piyola suv iching

Mutaxassislar uyqudan turgandan so‘ng bir piyola suv ichishni maslahat beradi, axir tun bo‘yi ancha suyuqlik bug‘lanib, terini tark etadi. Suvga limon bo‘lagini qo‘shsangiz, yanada yaxshi — limon sharbati jigardan toksinlar chiqib ketishini ta’minlaydi, suv esa ushbu shlaklarni yuvib ketadi.

Nonushta qiling

Aynan ertalabki ozuqa bizga butun kun uchun quvvat beradi, shu sababli unga jiddiy yondashish zarur. Diyetologlar kunni so‘li yormasi (ovsyanka) bilan boshlashni maslahat beradi. Unda B guruhiga oid vitaminlar ko‘p miqdorda mavjud bo‘lib, ular asab tizimimiz salomatligi, shuningdek teri tozaligi va sochlar qalinligi uchun javob beradi.

Sovuq suvda yuvining

Sovuq suv yuzni tetiklantirib, qon aylanishini yaxshilaydi. Bundan tashqari, sovuq suvda xlor konsentratsiyasi issiq suvdagiga qaraganda kuchsizroq bo‘ladi, bu esa teri uchun foydaliroqdir.

O‘z bioritmingizga quloq turing

Organizmimiz o‘zining ichki soatiga qarab yashaydi va sutkaning turli qismida ma’lum bir protseduralarni turlicha qabul qiladi. Chunonchi, ertalabki 8 da qon aylanishimiz faollikning cho‘qqisiga chiqadi. Teri esa nimaga duch kelsa, o‘shani o‘ziga darhol singdirib oladi va o‘sha paytda allergiyaga moyilligi kuchli bo‘ladi. Shu tufayli ertalab husnbuzarlarni siqish, hammom va sauna qabul qilish taqiqlanadi. Biroq basseynda cho‘milish, aksincha juda foydali bo‘ladi. Bundan tashqari, ozish maqsadida yugurmoqchi bo‘lsangiz, bu ham ertalab ayni muddaodir.

Terini tozalang

Ko‘pchilik terini faqat kechqurun tozalash kerak, kechasi bilan u kirlanishga ulgurmaydi, deb hisoblaydi. Ta’kidlash joiz, teri tuni bilan nafas oladi, yog‘ va namlik ajratib chiqaradi, ularga esa xonadagi turli changlar yopishadi. Biroq terimiz eng ko‘p o‘z ajralmalaridan — o‘lik hujayralardan azob chekadi, ular yuz rangini xira qilib, erta qarishga olib keladi.

Budilnik bilan uyg‘oning

Mutaxassislar fikricha, ertalab budilnik jiringlagach, uni bir necha daqiqa keyinga surib, uxlash organizm uchun umuman foydasiz. Aksincha, bunday paytdagi uyqu bezovta, sifatsiz va samarasiz bo‘ladi. Budilnik bong urishi bilan uyg‘onish odatini rivojlantiring, uxlashga yotishda budilnik millarini har doim bir xil vaqtga qo‘ying.